ភ្នំពេញ៖ អគ្គនាយកដ្ឋានទូរទស្សន៍ជាតិ ទទក ស្នើឱ្យបុគ្គលដែលប្រើឈ្មោះ និងរូបថតមន្ត្រីរាជការ និងមន្ត្រីជាប់កិច្ចសន្យារបស់អង្គភាពដែលផ្ញើសារទារលុយអាជ្ញាធរខេត្ត ឱ្យបញ្ឈប់សកម្មភាពជាបន្ទាន់ដោយព្រមានចាត់វិធានការផ្លូវច្បាប់បើសិនជាពួកគេនៅតែបន្តធ្វើទៀត។

ក្នុងសេចក្ដីប្រកាសព័ត៌មានចុះថ្ងៃទី១៨ ខែតុលា ឆ្នាំ២០២១នេះ អគ្គនាយកដ្ឋានទូរទស្សន៍ជាតិ៊បានលើកឡើងថា ថ្មីៗនេះមានជនខិលខូចបានលួចប្រើប្រាស់ឈ្មោះ និងរូបថតមន្ត្រីរាជការ និងមន្ត្រីជាប់កិច្ចសន្យានៃអគ្គនាយកដ្ឋានទូរទស្សន៍ជាតិ ដោយបានបន្លំផ្ញើសារតាមប្រព័ន្ធតេឡេក្រាមទៅកាន់ថ្នាក់ដឹកនាំមន្ត្រីអាជ្ញាធរនិងស្ថាប័នជំនាញមួយចំនួនដើម្បីសុំថវិកាមួយចំនួនក្រោមរូបភាពខ្វះខាតនៅពេលចុះបំពេញបេសកកម្មនៅតាមបណ្ដាខេត្ត ហើយខ្វះខាតថវិកាសម្រាប់ចំណាយផ្ទាល់ខ្លួន។

អគ្គនាយកដ្ឋានទូរទស្សន៍ជាតិបានស្នើឱ្យជនខិលខូចទាំងនោះបញ្ឈប់ការក្លែងបន្លំទាំងនេះខណៈព្រមានចាត់វិធានការផ្លូវច្បាប់ប្រសិនបើនៅតែបន្តធ្វើរឿងនេះទៀត។

ទទក បានលើកឡើងថា៖ «ជនខិលខូចខាងលើនេះ ជានិច្ចកាលតែងបានប្រើប្រាស់ឈ្មោះ និងរូបថតរបស់មន្ត្រីរាជការ និងមន្ត្រីជាប់កិច្ចសន្យាអគ្គនាយកដ្ឋានទូរទស្សន៍ជាតិកម្ពុជាដដែលៗ លេខទូរសព្ទដដែលៗ បានផ្ញើសារទៅកាន់ថ្នាក់ដឹកនាំខេត្ត និងអាជ្ញាធរខេត្តនីមួយៗ ហើយសុំថវិកាជាបន្តបន្ទាប់ តែលេខទូរសព្ទជនខិលខូចខាងលើផ្ដល់ទៅឱ្យមន្ត្រីសម្រាប់ទាក់ទង ឬផ្ញើថវិកាឱ្យនៅពេលទូរស័ព្ទចូលមិនមានអ្នកលើកទទួលទេ»។

អគ្គនាយកដ្ឋានទូរទស្សន៍ជាតិបានស្នើដល់អាជ្ញាធរតាមបណ្ដាខេត្តនានាប្រសិនជាមានករណីបុគ្គលទៅក្លែងបន្លំថាខ្លួនជាមន្ត្រីនៃអគ្គនាយកដ្ឋានទូរទស្សន៍ជាតិឱ្យទៅសុំថវិកាសូមទាក់ទងមកកាន់អង្គភាពអគ្គនាយកដ្ឋានតាមរយៈលេខ ០៧៨ ៧៨៩ ៨៦៨ ឬ ០១២ ៣៧៣ ១៣៦ ឬ ០១២ ៥៥៦ ៣៤៦៕